Mukhundo.com

नेपालमा सलह भित्रियो, नियन्त्रको विषयमा छलफल गर्न कृषि मन्त्रालयले बैठक बोलायो


mukhundo.com, २०७७ असार १३ शनिबार


नेपालमा सलह भित्रियो, नियन्त्रको विषयमा छलफल गर्न कृषि मन्त्रालयले बैठक बोलायो

काठमाण्डौँ । नेपालमा पनि सलह भित्रिएको छ । छिमेकी मूलुक भारतसँग सीमा जोडिएका पर्सा, बारा र सर्लाहीका केही ठाउँमा शनिबार बिहान ८ बजे सलह कीराका समूह देखिएको स्थानीयले बताएका छन् ।

‘शनीबार बिहान रूखमा सलह कीरा बसेको देखेपछि किसानले खबर गरेको कृषि ज्ञान केन्द्र बाराका प्रमुख जीतेन्द्र यादवले बताए । उनका अनुसार अहिले केन्द्रको टोली स्थलगत अध्ययनका लागि सलह प्रकोप स्थलमा रहेका छन् ।

उनले सलह कीरा नेपालमा देखिएकोबारे कृषि मन्त्रालयमा जानकारी गराइएको बताए। ‘यसबारे छलफल गर्न आज दिउँसो १ बजे मन्त्रालयले जुम मिटिङ राखेको छ,’ उनले भने। यादवका अनुसार बारा जीतपुर, सिमरा नगरपालिका, निजगढ नगरपालिकामामा सलह देखिएका छन्।

बारामा शनिबार देखिएको सलह। तस्वीर स्रोत: जीतेन्द्र यादव/कृषि ज्ञान केन्द्र बारा।

मन्त्रालयका प्रवक्ता हरिबहादुर केसीले सलह नेपाल प्रवेश गरेकोबारे सूचना आए पनि यसको पुष्टि भइनसकेको बताए। ‘यसबारे अहिले १ बजे छलफल गर्न बैठक छ,’ उनले भने।

यसअघि नेपालमा सलह प्रवेश गर्न सक्ने भन्दै मन्त्रालयले प्लान्ट क्वारेन्टाइन तथा विषादी केन्द्रका प्रमुखको अध्यक्षतामा कृषि वैज्ञानिक र प्राविधिकहरु सम्मिलित समिति गठन गरेको थियो।

अफ्रिकी मुलुकबाट अरबियन देश हुँदै एसियाको इरान, अफगानिस्तान, पाकिस्तान र भारतसम्म आइपुगेको सलह कीरा नेपालमा पनि आएको हो।

सलह फट्याङ्ग्रा वर्गको कीरा हो। संयुक्त राष्ट्रसंघको कृषि तथा खाद्य संगठनले यो कीराको नाम सलह दिएको छ।

सलहको वैज्ञानिक नाम Schistocerca Gregaria हो। यसले कृषि बालीमा अमेरिकी फौजी कीराले भन्दा बढी क्षति पुर्‍याउँछ।

सलह कीरा करोडौंको संख्यामा हुन्छन्। यो कीराले हरियो वनस्पतिलाई छोटो समयमा पात र डाँठ समेत गरी खाइदिन सक्छ।

यस्तै एक दिनमा १ सय ५० किलोमिटर भन्दा बढी टाढा सम्म पुग्न सक्छ।

यो कीराको प्रकोप खासगरी जेठ महिनादेखि असोजसम्म हुने गर्छ। जलवायु परिवर्तन र वातावरणमा भएको सुख्खापनले सलह किराको जनसंख्या बढेको अन्तर्राष्ट्रिय कृषि वैज्ञानिकहरुले बताउँदै आएका छन्।

प्रतिकृया

प्रतिकृया

Advertisement